शिक्षा, विज्ञान तथा प्रविधि मन्त्री
महावीर पुनले पदभार ग्रहण गरेका छन् । केशरमहलस्थित शिक्षा मन्त्रालय
पुगेर सोमबार अपराह्न मन्त्री पुनले पदभार ग्रहण गरेका हुन् ।
त्यसअघि राष्ट्रपति भवन शीतल
निवासमा उनले पद तथा गोपनीयताको शपथ लिएका थिए । मन्त्री पुनले मन्त्रालयमा
पत्रकारहरूसँग कुराकानी गर्दै विज्ञहरूलाई बोलाएर कुराकानी गर्ने र विज्ञहरूकै
सुझावअनुसार छिटो काम गर्ने प्रतिक्रिया दिएका छन्।
विज्ञान, प्रविधि र नवप्रवर्तन र
अनुसन्धान नै प्राथमिकतामा रहेको उनले बताए । ‘शिक्षाप्रति के गर्न सकिन्छ
भन्ने कुरा अहिले म बताउन चाहन्न, के के गरिन्न अहिले भन्ने कुरा होइन। अपरझट यहाँ मन्त्री
भइएको छ,’ उनले भने, ‘म राजनीति क्षेत्रमा अनुभवी पनि होइन, योजना बनाएर आएको पनि होइन।
किताब बेच्दै गरेको मानिसलाई मन्त्री बनाइदिएपछि के गर्ने भनेर अहिले नसोध्नुस्।’
उनले युवाहरूलाई आफ्नो
बुद्धिअनुसार काम गर्नुपर्ने पनि बताए । उनले आफू मन्त्री नबन्ने सोचमा
रहे पनि परिस्थितिका कारण मन्त्री बन्नुपरेको बताए। ‘म औपचारिक रूपमा मन्त्री भएको
हो,
व्यवहारिक
रूपमा भएको छैन। सेवासुविधा केही चाहिन्न, मन्त्रालयमा काम गर्ने हो, त्यहाँ किचन होला, ओछ्यान लगाएर सुत्ने हो,’ उनले भने ।
आफू मन्त्री हुँदा नि:शुल्क शिक्षा दिन नसक्ने पनि उनले बताए। ‘अरे म मन्त्री
हुँदैमा नि:शुल्क शिक्षा कसरी दिने? म भगवान हो र? केही न केही राम्रो
काम गरौंला,’ उनले भने।
