तेह्रथुम / छथर गाउँपालिका तेह्रथुमको गाउँसभा तथा १७ औँ अधिवेशन
बुधबार सम्पन्न भएको छ। गाउँपालिका–३ स्थित बराह मन्दिर परिसरमा आयोजित अधिवेशनमा
आर्थिक वर्ष २०८३/०८४ का लागि नीति तथा कार्यक्रम तथा बजेटको सीमा प्रस्तुत गरिएको
हो।
गाउँसभामा प्रस्तुत नीति तथा कार्यक्रमअनुसार आगामी
आर्थिक वर्षका विकास योजनाहरूलाई उत्पादन, रोजगारी र पूर्वाधार विकाससँग जोडेर सञ्चालन गरिने भएको छ। प्रत्येक वडा
समितिले राष्ट्रिय रोजगार कार्यक्रमअन्तर्गत कम्तीमा एक योजना समावेश गर्नुपर्ने
व्यवस्था गरिएको छ भने लक्षित वर्गका कार्यक्रमलाई समेत प्राथमिकतामा राखिएको छ।
गाउँपालिकाले अधुरा योजनाहरू सम्पन्न गर्ने, ‘एक टोल एक विकास अवधारणालाई प्राथमिकता दिने, सामूहिक उत्पादन तथा प्रविधिमा आधारित योजनालाई
प्रोत्साहन गर्ने नीति अघि सारेको छ। विद्यालयहरूमा स्वच्छ खानेपानीको पहुँच
विस्तार तथा मुख्य सडकहरूलाई क्रमशः स्तरोन्नति गर्ने योजना पनि नीति तथा
कार्यक्रममा समेटिएको छ।
प्रस्तुत बजेट सीमाअनुसार संघीय सरकारबाट वित्तीय
समानीकरण, राजस्व बाँडफाँड, सशर्त, विशेष तथा समपूरक अनुदान गरी करिब ४२ करोड ३९ लाख बढी रुपैयाँ प्राप्त हुने अनुमान गरिएको छ।
प्रदेश सरकारबाट विभिन्न शीर्षकमा ३ करोड ८८ लाख रुपैयाँभन्दा बढी प्राप्त हुने प्रक्षेपण गरिएको र गाउँपालिकाको
आन्तरिक आय १ करोड रुपैयाँ रहने लक्ष्य राखिएको गाउँपालिका
अध्यक्ष सन्तवीर लिम्वु (सन्तोष तिगेला) ले
बताउनु भयो।
यसरी आगामी आर्थिक वर्षका लागि गाउँपालिकाको कुल
अनुमानित बजेट ४७ करोड २७ लाख ११ हजार ६ सय ३४
रुपैयाँ निर्धारण गरिएको छ।
गाउँसभामा गाउँपालिका अध्यक्ष, उपाध्यक्ष, वडाध्यक्ष, कार्यपालिका सदस्य, जनप्रतिनिधि तथा विभिन्न सरोकारवालाको सहभागिता रहेको
थियो। अधिवेशनमा प्रस्तुत नीति तथा कार्यक्रम तथा बजेटमाथि छलफल गर्दै आगामी
आर्थिक वर्षका प्राथमिकता तय गरिएको गाउँपालिकाले जनाएको छ।
कृषि, रोजगारी, खानेपानी, शिक्षा, सडक तथा आधारभूत पूर्वाधार विकासलाई केन्द्रमा राखेर आगामी वर्षका कार्यक्रम
सञ्चालन गरिने नीति गाउँसभामार्फत सार्वजनिक गरिएको छ।
